நான் ஒருஓவியம் வரைந்தேன்

பறக்கும் அந்த ஜோடிப்புறாக்களில்

ஒன்று நான் எனில் மற்றொன்று யார்

என்ற ஆர்வம் உங்களுக்கு

மூடிய அந்தக் கதவுக்குப் பின்னால் இருப்பது

நான் தான் என்பதை

உறுதி செய்துகொள்ளும் பதற்றம் உங்களுக்கு

அடித்துப் பெய்யும் அம்மழைக்காட்சி

என் சோகமா வெறுமையா காமத்தின் சாயலா

பெருத்த ஐயம் உங்களுக்கு

ஒரு மோப்பநாயினை ஒத்து

என் ஓவியத்தைக் கலைத்திருக்கிறீர்கள்

நானொரு கவிதை எழுத விளைகிறேன்

அதிலேனும் என்னைத் தேடாதிருங்கள்

****

நன்றி:மலைகள்.காம்