Wednesday, May 8, 2019

சூல் கொண்ட மேகத்தின் மௌனம்
அடர்ந்துகொண்டே போகிறது
இனி எந்நேரத்திலும்
பனிக்குடம் உடைந்து
அழுகுரல் கேட்கலாம்
சாக்கடைப் புணர்ந்து கொல்லும்
என்றறிந்தபின்பும்

என் தூய மழையே!
இப்பெருநகரில்
இன்னும்
ஏன் பொழிந்துகொண்டிருக்கிறாய்?!

Tuesday, May 7, 2019

மழையால் மட்டுமே முடிகிறது

இதழ்களில் அத்தனை மௌனத்தையும்
இதயத்தில் அத்தனை இரைச்சலையும்

ஒரே சமயத்தில் தந்துவிட..

Monday, May 6, 2019

மௌன மழை



தூமைகாலப் பெண்ணாய்
மேகம்
மெல்லக் கசிந்து கொண்டிருக்கிறது

Sunday, April 28, 2019

மௌனத்தைச்
சிதையிலேற்றுகிறேன்
சொற் சுள்ளிகளை வீசி எரி

உறைந்த வானில்
சிறு புள்ளியெனப் பற

குருடனின் திருவோட்டில்
சிற்றொலியாய் வீழ்

மூளிச் சிலையின் மேல்
கதிரவனாய் பொழி

ஊமைக் குயிலை
வெறித்திருத்தல் துயரம்

Tuesday, April 23, 2019

பாலைத்தீயிது
தீட்டு வாளை

உதிரம் தெறிக்க
எனை உருவி எடு

உதடுகள் சிம்மாசனம்
ராணியை ஏற்றி அமர்த்து

நா புரவி

குளம்பொலி
அண்டம் அதிரட்டும்

முதுகில் சர்ப்பத்தடம்
காதுமடல் தணல்

பாத விரல்முலைகள்
முதுவேனில் நனைக்கட்டும்

நிமிரும் இருபறைகள்
அதிர முழங்கு
புவி பிளந்துப் பீறிடட்டும்

Sunday, April 21, 2019

இதயம் இடம்பெயர்ந்தாயிற்று
மணிக்கட்டு நரம்புகள்
கண்திறந்து சிரிக்கின்றன
மூளையின் பின்மேட்டில்
அருவி பீறிடுகிறது
உடல் வெறும் கூடென்று
சொன்னவன் எங்கே
இரவு ஒரு இடுகாட்டு நாய்
நடுங்கும் என் நெற்றியில்
எச்சில் இடு
சுரவா முலையைத் தின்னக்கொடு
வியர்வையால் போர்த்து
நிலாவைச் சுருட்டி இசை
மெல்லப்பரவும் பாடலுக்கு
நீலநிறம்
மௌனத்தைச்   
சிதையிலிடுகிறேன்
நரம்புகள் வெடித்துச் சிதறுகையில்
நூறு முடசூரியன்கள்

Saturday, April 20, 2019

பெரும் கோட்டையென இறுமாந்திருந்தேன்
விரல் கொண்டு சுண்டும்
என் ஆதியந்தமே
நடுங்கும் அதன் அஸ்திவாரம் பாராய்
கதறும் என் இதயத்தின்
ஒலி கேட்கிறதா
இறைஞ்சும்
இக்கண்களைப் பொசுக்குங்கள்
என் கூந்தல் கொண்டு
குரல்வளையை முடிச்சிடுங்கள்
பால்மறவா சிறு நாயிது
ஊர்தாண்டிய சாலையில்
கைவிடமாட்டீரா


Sunday, April 14, 2019



ஒரு எளிய சிறுமி
காலத்தின் சக்கரத்திற்கு
கூழாங்கற்களை தடையாக இட முயல்கிறாள்
அரைத்து நகரும் சக்கரத்தில்
 ஈரமில்லை

விரும்பி வந்து சேர்ந்த பாதை
திரும்பிப்போகும் எண்ணமில்லை

பருவம் தப்பி மலரும் மலர் தான்
தனித்து மணக்கிறது

தொலி உடைத்து வெளியேறும்
மென் அலகின் வலி
ஏற்கக்கடவது