அந்தர ஊஞ்சல்

சிறகுகள் படபடக்க காத்திருக்கிறது
என் வெள்ளை நிறக் குதிரை 

தகிக்கும் 

அதன் பிடரி மயிரை 
பற்றிஏறி அமர்கிறேன் 

எரிகல்லின் பாய்ச்சலுடன்
திமிரித்தாவிப் பறக்கிறது
வாகனம் 

என் ஆடைகள் கரைந்து
காணாமல் ஆகின்றன
கூந்தல்
கைவிரித்து
களிஆட்டம் கொள்கிறது
நிலாவை
சூடியிருக்கும் எனது மேனியெங்கும்
பூத்த நட்சத்திரங்கள் 

வரைபடம் அற்ற
எனது பயணத்தில்
பற்றி எரிகின்றன
வேலிகள்

பாதைகள்
உருகி வழிகின்றது 

நதிகளை
திசை திருப்புகின்றேன் 

இப்பூமியை நசுக்கி
துகள்களாக்கும்
சூத்திரம் அறிந்தவள் நான் 

சீறிப்பாய்ந்து
வானம் ஏறுகின்றேன்

என் மார்சுரந்து
பொழியும் பெருமழையில்
இப்புவி
நனைந்து தணிகிறது 

****