கொடுமைக்கு வாக்கப்பட்டவள்
நெருப்பை பொங்கித்தின்பவள்
மஞ்சள் குளியலில் காயம் ஆற்றுபவள்
பொறந்தவீடும் கதவடைத்துக்கொண்ட
பாதம் பழுக்கும் உச்சி வெயில்
பொழுதொன்றில்
குத்துப்பட்டு செத்துப்போன முனியாண்டியைக் கூட்டிக்கொண்டு வீடுவந்து சேர்கிறாள்
கெட்டவார்த்தையைக் காறி உமிழுமவள்
தலைவிரித்து பேயாட்டம் போடுகிறாள்
நெஞ்சை நசுக்கும் பாரங்களை எல்லாம்
திசைகள் தோறும் தெறிக்கவிடுமவள்
வீடு அதிர நடந்து பார்க்கிறாள்
கைநிறைய சோறு வாரித்திங்கவும்
கால் பரப்பி கூடத்தில் தூங்கவும்
முனியாண்டியைத் தான்
துணைக்கு நிறுத்துகிறாள்
சுருட்டும் கருவாடும் சாராயமும்
தட்சணையாய் கேட்கும்
பூசாரியைக் கூட்டிக்கொண்டு
புறப்பட்டு வருகிறானாம்
அவள் பொறந்தவன்
அடிபட்டுச் சாகத்தான் பொறப்பெடுத்தேனா
உங்கக் கோடித்துணிக்குத்தான்
உயிர் வளர்த்தேனா
சங்கறுத்து மாலையா போடுவேன்டா
சாத்திரத்தில் மூத்திரத்தப் பெய்வேன்டா
தூக்கிக்கட்டிய சேலையும்
சிவந்து தெறிக்கும் விழிகளுமாய்
வானம் அதிர முழங்குகிறான்
முனியாண்டி
அடங்கி அமிழ்கிறது வீடு
புலர்ந்து வருகிறது பொழுது
****
No comments:
Post a Comment