நினைவுகளை அழித்தல்

நினைவுகளின் தேன்கூட்டை  அழிக்க முடிவெடுத்தபின்
முதலில்
இதயத்தைச் சுற்றி
இறுக்கி மூடுங்கள்

ஓயாமல் ரீங்கரிக்கும்
சின்னஞ்சிறு நினைவுகளை
தீயிட்டுப் பொசுக்குகையில்
நொடிப் பொழுதும்
தயங்கித் தடுமாறாதீர்கள் 

தீயைத் தாண்டிவந்து நினைவுகள் கொட்டுகையில்
பற்கடித்து வலி பொருத்து
முன்னேறுங்கள்

ராணித் தேனீயை கொல்லுதல் என்பது
ஒரு வாழ்வின் குரல்வளையை அறுத்தலாகும்

இப்போது
கைநிறைய நெருப்பை
அள்ளி எடுங்கள்
மிக தீர்க்கமாக அதன்
தலைமேல் கொட்டுங்கள்

புகைப்படத்தை அழித்தல் போல் அல்ல
நினைவுகளை அழித்தல்

அனைத்தையும் எரித்து அழித்துத் திரும்புகையில்
புறங்கையில்
உடன் ஒட்டிவரும் மகரந்தம்
கவனித்தீர்களா?

இப்போது
தீயில்
ஒருமுறை
முங்கிக் கரையேறுங்கள்

பின் இதயத்தை இறுக்கி மூடுங்கள்

***