ஒரு துண்டு வானம்

வேட்டு அதிரும் பூமியிலும்

சுள்ளியுடன் பறக்கும் பறவையை

வானம் காண்கிறது

காடு பற்றி எரிகையிலும்

எங்கோ சில மொட்டுகள்

மணத்துடன் அவிழ்கின்றன

உயிர் பதுங்கும் இருளுக்குள்ளும்

ஒரு மெல்லிய முத்தம்

பகிரப்படுகிறது

சப்பாத்துக்கள் நெரியும் நிலத்திலும்

ஒரு மண்புழு

சிரத்தையுடன்

மண்ணைப் புரட்டிக்கொண்டுதான் இருக்கிறது

ஒரு சொல்லின் நெற்றியில்

குண்டு துளைக்கையில்

எங்கோ ஒரு வாக்கியம்

உருவாகிவருகிறது

****

சுஜாதா செல்வராஜ் ,

பெங்களூர் .