அப்பா

உன் சொற்களை
திரும்பப் பெற்றுக்கொள்

ஒரு பூங்கொத்தைத் தருவதென
நீ அவைகளை கை சேர்த்தாய்
அவை பூக்கள் அல்ல

உன் சொற்கள்
விலங்கிடப்பட்ட
வெள்ளை மூளியாய்
தரை தேய விட்டிருக்கிறது
என் தாயை

எனக்கு ஒரு சொல் தந்தாய்
அது என்னையே
காவு கேட்கிறது
செதில் செதிலாய்
துண்டாடுகிறது

கசக்கும் எச்சில் பாலை
சப்பத் தந்துவிட்டு
எங்கு போய் தொலைந்தாய்

திரும்பி வா
உன் கன்னம் பழுக்கும்படி
மீண்டும்
ஒரு அறை கொடுக்கவேண்டும்
உன் கைகளுக்குள்
முகம் புதைக்கவேண்டும்
உனக்கு மிகப்பிடித்த
நானொரு ராசியில்லா ராஜாவை
பாட வேண்டும்

அவசரம்
ஒரு போத்தல்
சாராயம் வாங்கி வா
எரிந்து சாவோம்
கூடவே
எனக்கு பிரியமான
மசால் வடையும்

*****