உடல் கட்டையாய் கிடக்கையில்
உள்ளம் கையறு நிலையில் தவிக்கிறது
உலகையே இயக்கும் சாவி
உறைந்த இந்தக் கைகளில் தான் இருக்கிறது
எழுந்துவந்தால்...
ஊர்க் கூட்டி நண்பனை அறிமுகப்படுத்துவேன்
துரோகியை அணைத்து முத்தமிடுவேன்
என் காயங்களைத் திறந்து ஆறவிடுவேன்
வடுக்களை உங்களுக்கு வருடத் தருவேன்
மலை கிராமத்திற்குப் பயணம் போவேன்
காது வளர்த்த கிழவியின் கையில் சோறு தின்பேன்
அரட்டை ஒழுக திண்ணையில்
தூங்கிப்போவேன்
ஆடுவேன்
பாடுவேன்
ஓடுவேன்
இன்னும் சத்தமாய் சிரிப்பேன்
அழுவேன்
இன்னும் சத்தமாய்
தலைமுறைகள் தாண்டி
உறைந்து கிடக்கும் உள்ளம்
உடல் கட்டையாய் கிடக்கையில் தான்
கையறு நிலையில் தவிக்கிறது
